လောကပြတင်းစာကြည့်တိုက်အတွက် ဆရာတော်အရှင်စန္ဒာလင်္ကာရ(မင်းစံ(ပေါင်းဝ) ၏ လောကပြတင်းကဗျာ
လောကပြတင်း(စာကြည့်တိုက်)
မှောက်မိုက်မဲမဲ
အတ္တအကျဉ်းခန်းထဲမှာ
တွန်းဆွဲရုန်းဖွင့်
လောကပြတင်းနှစ်ချပ်
လွတ်လပ်စွာပွင့်လေပြီ။
ဟေ....ကြည့်စမ်းကွယ်
စိမ်းစိမ်းစိုစို
ပင်ညောင်ညိုရိပ်
သာယာတဲ့ ဆိပ်ကမ်း
စိမ့်စမ်းကြည်ကြည်မြနဒီနဲ့
ညီညာဖြောင့်စင်း မွှေးရနံသင်းတဲ့
ပန်းခင်းလမ်းလေးလဲ တွေရမယ်။
ဇရပ်အိုရေတွင်းပျက်
ရွှံ့ညွန်ဗွက်တော
အတက်အဆင်းပေါပေါ
ဆူးညောင့်တသောသောနဲ့
ခရောင်းတောလမ်းကြမ်းကိုလဲ တွေ့ရမယ်။
အမှားနဲ့အမှန်
အဆိုးနဲ့ အကောင်း
အဟောင်းနဲ့အသစ်
အချစ်နဲ့ အမုန်း
အရူံးနဲ့အနိုင်
အယုတ်နဲ့အမြတ်
နတ်သုဒ္ဓါနဲ့ အဆိပ်
အတိတ်နဲ့ အနာဂတ်
ယုံအပ်မယုံအပ်
ဆုံးဖြတ်တတ်တဲ့ ဥာဏ်အလင်း
လောကပြတင်းနှစ်ချပ်
လွတ်လပ်စွာ ပွင့်လေပြီ။
ကောင်းရာပွေ့ဖက်
အမြင့်တက်လို့
အတက်ပျံ
စစ်မှန်တဲ့ ဘ၀အလင်းတန်း
လန်းဆန်းမြူးကွန့်တင့်စေသော်။
အရှင်စန္ဒာလင်္ကာရ (စစ်ကိုင်းတိုင်းဒေသကြီး၊ကနီမြို့နယ်၊တပုန်းအုပ်စု၊တပုန်းကျေးရွာ၊လောကပြတင်းစာကြည့်တိုက်ကဗျာဖြစ်ပါသည်။
No comments:
Post a Comment